Werder Bremen

Jæja, þá er kominn föstudagur og það þýðir að umferð 2 í Bundesligunni er að hefjast. Á morgun er fyrsti heimaleikur Bayern á Allianz. Gestirnir eru ekki af verri endanum, Werder Bremen. Þessi leikur vekur hugljúfar minningar hjá Keizaranum þar sem hann sá einmitt Bayern og Werder Bremen spila á Allianz 2005 ásamt Dr Leifssyni. Úff, það var góð ferð..

Werder Bremen er fornfrægt lið og voru mjög sterkir fyrir nokkrum árum en hafa aðeins verið að missa dampinn síðustu ár. Þeir unnu tvöfalt árið 2004 en hafa svo hægt og rólega verið að missa dampinn. Þeir enduðu í tíunda sæti í fyrra en urðu þó bikarmeistarar. Hinsvegar komust þeir ekki inn í Meistaradeildina en í henni hafa þeir spilað síðustu 5ár.

Þeir byrjuðu seasonið frekar illa í síðustu viku, töpuðu óvænt fyrir Eintracht Frankfurt og kom það flestum mjög á óvart. Hinsvegar hafa þeir náð mjög góðum úrslitum á móti Bayern á Allianz undanfarin ár. Þeir hafa aðeins tapað einu sinni þar á síðustu fjórum árum, einmitt á leiknum sem Keizarinn fór á. Í fyrra unnu þeir meiraaðsegja Bayern 2-5 á Allianz.

Félagið var stofnað, já haldið ykkur nú fast, já, árið 1899. Hvernig er það, eru ÖLL fótboltalið stofnuð þetta ár? Þeir koma að sjálfsögðu frá samnefndri borg í norður-Þýskalandi. Þess má geta að hinn ljúffengi Becks bjór kemur einmitt þaðan, þannig að sannir Bremen-aðdáendur eins og Besserwisserinn ættu að hafa það í huga þegar þeir velja sér bjór.
Bremen er eitt af fáum fótboltaliðum í Þýskalandi sem kemur frá hafnarborg og eru aðdáendur liðsins gjarnan uppnefndir “Fischköppe” eða fiskihausarnir af öðrum liðum.

Félagið á sér nokkuð flotta sögu að baki. Þeir eru sterkasta lið norður-Þýskalands ásamt Hamburger SV og eru leikir þessarra liða miklir norðurslagir. Þeir hafa mikla sögu og má rekja uppgang félagsins á níunda áratuginum til tíma Otto Rehagels sem tók þá við liðinu. Þá léku með liðinu fræg nöfn eins og Klaus Allofs, Mario Basler, Dieter Eilts, Miroslav Klose og svo maður tali nú ekki um einn uppáhaldsframherja Keizarans, Karl-Heinz Riedle. Thomas Schaaf tók svo við liðinu 1999 og þeir áttu aftur blómaskeið fyrri hluta þessa áratugs þegar þeir unnu m.a. tvöfalt árið 2004.

Í fyrra enduðu þeir í tíunda sæti í Bundesligunni sem er versti árangur þeirra í deildinni í meira en áratug. Í staðinn gátu þeir þó huggað sig við það að verða bikarmeistarar. Þeir komust einnig í úrslit í UEFA bikarnum en töpuðu þar fyrir Schaktar Donetsk.

Leikmannahópurinn

Markmaður
Tim Wiese er einn af bestu markvörðum deildarinnar. Hann er búinn að vera hjá félaginu síðan 2005 og einn af þeim sem er að slást um landsliðsmarkvarðarstöðuna hjá Þýskalandi.

Varnarmenn
Bremen er með sterka vörn en skarð er fyrir skildi að eilífðarfyrirliðinn Frank Baumann lagði skóna á hilluna í sumar. Lítum á nokkra gaura….
Petri Pasanen er finnskur landsliðsmaður og kemur úr unglingaakademiu Ajax. Hann var talinn einhver efnilegasti varnarmaður heimsins á sínum tíma en eitthvað dalaði svo ferillinn. Hann fór svo til Portsmouth í eitt ár en hefur nú verið hjá Werder Bremen í nokkur ár.
Clemens Fritz. Margir muna kannski eftir honum frá EM í Portúgal 2008. Þýskur landsliðsmaður og er, eins og þýskir bakverðir eru gjarnan, með mikla yfirferð á sínum kanti og mjög sókndjarfur. Ekki ósvipuð týpa og Phillip Lahm hjá Bayern.  Átti reyndar frekar lélegt tímabil í fyrra.
Per Mertesacker. Þýskur landsliðshafsent. Stór og sterkur, og tapar ekki mörgum skallaboltum, enda 198cm á hæð. Leikið 58landsleiki í þýsku vörninni og er þar lykilmaður. Mikill turn og minnir stundum á Volker Zerbe á velli, svo stór er hann.  Hann lyftir þó meira í bekk en hann.
Brasilíumaðurinn Naldo er hinn helmingur hafsentapars Bremens. Hann hefur leikið í Bundesligunni lengi og er einn albesti varnarmaður deildarinnar. Hann var reyndar ekki með vegna meiðsla í fyrsta leiknum á móti Leverkusen og þótti koma mikið óöryggi í varnarleik Bremens vegna þessa. Austurríkismaðurinn Sebastian Prödl er næsti maður inn í hafsentastöðuna og lék á móti Leverkusen. Hann var reyndar rekinn af velli í þeim leik, ekki fyrir að vera Austurríkismaður heldur fyrir karlmannlegt brot.

Miðja
Miðjuspil Werder Bremen hefur beðið talsverða hnekki eftir að þeir seldu Diego til Juventus. Hann hefur verið prímusmótorinn á miðjunni undanfarin ár og stjórnað sóknarleiknum og jafnframt verið einn markahæsti leikmaður liðsins. Bremen ákvað ekki að kaupa nýjan leikmann heldur treysta á ungu leikmennina að stíga upp. Þarna skiptast á reynsluboltar og svo kornungir efnilegir gaurar. Torsten Frings er þarna kóngurinn og auðvitað einn besti holding miðjumaður heimsins. Hann er jafngrófur og áður en hinsvegar er hann aðeins farinn að eldast. Tim Borowski kom aftur til Bremen frá Bayern í sumar og mun koma með reynslu inn á miðjuna. Hann er sókndjarfari en Frings en einhvernveginn virðist hann aldrei ná almennilega að slá í gegn. Með þeim eru svo nokkrir ungir og efnilegir menn. Þeir mest spennandi eru tveir tvítugir strákar úr U21landsliði Þjóðverja. Þetta eru þeir Marko Marin og Mesut Özil. Menn halda varla vatni yfir Özil. Hann var aðalmaðurinn í þýska U21 landsliðinu sem varð Evrópumeistari í sumar og er talinn ein helsta framtíðarvonin í þýska fótboltanum. Hann átti stórleik í leiknum um síðustu helgi og verður spennandi að fylgjast með Özil og vinstrifætinum hans í vetur.
Sókn
Þetta er lang veikasti hluti Bremens. Sóknin var áður aðalsmerki liðsins með menn eins og Miroslav Klose en nú er þetta ansi þunnskipað. Claudio Pizzarro var hjá þeim síðasta vetur en nú hefur hann aftur snúið úr láni til Chelsea. Bremen er þó að vinna í því að hann komi aftur. Þeir hafa yfir að ráða Svíanum Markus Rosenberg, sem áður var hjá Ajax, portúgalanum Hugo Almeida sem kom frá Porto og hefur leikið 20landsleiki fyrir Portúgal og svo er þarna landsliðsmaður frá Fílabeinsströndinni sem heitir Sanogo. Í leiknum gegn Leverkusen byrjuðu þeir Almeida og Sanogo en sýndu enga frábæra takta.

Þjálfari
Þjálfari er sem áður, refurinn Thomas Schaaf.

Leikaðferð
Thomas Schaaf líkar vel að spila all-out sóknarbolta og liðið pressar oft hátt uppi. Einmitt þessvegna hafa þeir Frings, sem liggur oft mjög aftarlega, vinnur boltann og kemur honum til leikstjórnandans. Þannig vinnur hann skítverkin á meðan léttari og hreyfanlegri miðjumenn sjá um galdrana. Undanfarin ár hafa þeir leikið hálfgert 4-3-1-2, með Baumann, Frings og Borowski aftanvið Diego. Nú verður Özil að stíga upp og sýna hvað hann getur.

 Brotthvarf Diego verður stórt og margir sérfræðingar reikna jafnvel með að Schaaf leiki með 2djúpa miðjumenn, Frings og Borowski og síðan 2sóknarsinnaða, þ.e. Özil og Marin.
Bremen stíla mikið inn á föst leikatriði og hafa þar mjög stóra og hættulega menn eins og Naldo, Mertesacker og Almeida.
Veikleikarnir í fyrra voru að mótherjarnir komust of auðveldlega í gegnum miðjuna og einkum í gegnum bakverði Bremens sem voru of veikir í fyrra. Sérstaklega verður Fritz að bæta sig.
Takist þetta verða Bremen sterkir en margir óvissuþættir eru fyrir seasonið.

Völlurinn
Völlurinn heitir Weserstadion og tekur 42þús manns.

Lok þýsku deildarinnar

Mig grunar að fólk finni sig í svolitlu tómarúmi núna.  Allavega þeir sem hafa gaman að fótbolta.  Í dag er nefnilega akkurat ein vika síðan þýska deildin kláraðist og þá í raun fór evrópuboltinn í frí, fyrir utan einhverja æfingaleiki. Ég ætla í þessum pistli að skilja við þýsku deildina, sem var alveg óvenju skemmtileg og spennandi. 

Já, Wolfsburg tók þetta.  Lítið hægt að segja við því og Keizarinn getur í sjálfu sér alveg unnt þeim að vinna.  Allavega skárra en að helvítis Schalke eða Stuttgart ynnu þetta.  Wolfsburg  áttu alveg ótrúlegasta seinni helming tímabils sem hefur sést í þýsku deildinni.   Voru í níunda sæti þegar deildin byrjaði eftir vetrarfríið en svo var þetta flugeldasýning alla leið framtil síðustu umferðar.   Annað sem kom á óvart var hversu sveiflukenndir Bayern voru en árangurinn annað sæti er ekkert að grenja yfir.  Svo kemur á óvart hve slakir Werder Bremen voru.  Að enda í 10sæti með mannskap eins og Frank Baumann, Diego og Torsten Frings er ekkert æðislegt.  

Lokaumferðin var nú nokkuð spennandi.  Á Allianz unnu mínir menn 2-1. Meira að segja yfirsteikin Lehman fór fram undir lokin og reyndi að skalla í netið en það tókst ekki. Það var gott enda ekki  vinsælasti maðurinn á Allianz.   Werder Bremen lagðist hreinlega á hnén á móti Wolfsburg og töpuðu 5-1.  Margir áttu kannski von á því að þeir myndu veita meiri mótspyrnu en þetta svona summar upp seasonið hjá Bremen.

Mínir menn geta svo sem ágætlega við unað miðað við allt. Þetta tímabil átti að verða algert gull.  Menn réðu Klinsmann, og eins og Uli Hoeness lét hafa eftir sér þá vissi hann varla um þjálfara sem var eins mikið látið eftir hvað varðar breytingar.  Öllu þurfti að breyta.  Hann breytti æfingum, skipti út læknaliðinu, þjálfaraliðinu og liðið keyrði algerlega eftir hugmyndafræði Klinsmanns.  Þessi hugmyndafræði beið algert skipbrot þegar leið á tímabilið og Klinsmann hafði ekki karakter í að rífa liðið upp.  Þannig var ekki um annað að ræða en að láta hann fara.   Miðað við þetta þá er 2sætið vel ásættanlegt, þ.e. meistaradeildarsæti og að hafa komist í 8liða úrslit í Meistaradeildinni.   

Fæstir þekkja þetta Wolfsburglið.  Þetta er svosem ekkert óþekkt lið í þýska boltanum en hefur enga hefð með sér og eru ekki búnir að vera í mörg ár í hópi þeirra bestu.  Segja má að uppgangur þeirra hafi byrjað þegar Felix Magath tók við þeim.  Hann var látinn taka pokann sinn hjá Bayern ( í tilviki Felix Magath þá var hann látinn taka lyftingadótið sitt) og byrjaði hjá Wolfsburg.  Hann er með þessum árangri að stimpla sig inn sem einhver albesti þjálfarinn í boltanum í dag.   Þú getur farið yfir liðsmannahóp Wolfsburg og þú staðnæmist ekki við mörg nöfn sem þú kannast við. 

Þannig er þetta nánast svona ”þjálfaratitill”.  Eins og Franz Beckenbauer sagði ” Magath hefur tekið meðallið í þýsku deildinni og gert það að meisturum”.  Hann hefur gjörbreytt hugsunarhætti liðsins, verið klókur að fá til sín ódýra leikmenn og svo er hann náttúrulega þekktur fyrir líkamsþjálfunaraðferðir sínar og dálætið á lyftingum.  Liðin hans eru nútíma fótboltalið sem keyra allan leikinn, með bæði kvika og sterka leikmenn. 

Í liðinu eru engar sérstakar stjörnur núna en menn sem eru að verða þekktir eftir að Wolfsburg er alltíeinu orðið þekkt.  Þeir hafa byggt upp á sterkri vörn, leikið mjög þétt aftast og síðan höfðu þeir framherjana Edin Dzeko og brasilíumanninn Grafite sem urðu held ég markahæsti og næstmarkahæsti leikmaðurinn í Bundesligunni.  Fyrir aftan þá hefur svo verið spielmacherinn Zvjezdan Misimovic sem stjórnar sókninni.    

Heimavallarárangurinn hefur að hluta til fært þeim titilinn.  Þeir spiluðu þar 17leiki, unnu 16 af þeim.   
Wolfsburg er eins og áður segir, ungt félag, stofnað á því dauðans ári 1945 í Þýskalandi og maður spyr sig eiginlega hvernig menn höfðu tíma til að stofna fótboltafélag á því ári, hélt að flestir í Þýskalandi hefðu þá verið uppteknir við annað !!

   Sagan á bakvið borgina Wolfsburg er skemmtileg.  Þarna hafði staðið einhver rosalegur miðaldakastali þar sem bæjarstæðið er núna. Kastalann reisti einhver barón á sínum tíma (alveg örugglega geðveikur, það er yfirleitt skemmtilegra).     

1931 hafði bílahönnuður, Ferdinand Porsche, komið með hugmynd að venjulegum bíl sem hinn venjulegi Þjóðverji gæti keypt. Hann yrði nógu ódýr til að hinn venjulegi borgari gæti keypt hann og hann myndi bila sjaldan.   2árum seinna hitti hann gaur með yfirvararskegg  sem fannst þetta vera frábær hugmynd. 

 Hugmyndin var að nútímavæða Þýskaland og allir gætu fengið sér sæmilegan bíl. Menn voru ekkert að vesinast með bensínskatta og það að bíll væri hættulegur umhverfinu heldur var fólki gert kleyft að eignast mannsæmandi bíl.  Enda var Steingrímur Joð ekki fæddur þá.

 Bíllinn var framleiddur undir formerkjunum “Kraft durch Freude” og þetta er að sjálfsögðu þessi Volkswagen-bíll, þ.e. bíll fólksins.  Verksmiðjunum var fundinn staður í nágrenni kastalans og árið 1938 lagði Dolli hornstein að verkjsmiðjunni.    Síðan hafa Volkswagenverksmiðjurnar verið þarna, borgin Wolfsburg hefur vaxið og dafnað og þess má geta að Volkswagen er einn helsti styrktaraðili Wolfsburgliðsins. 

Næsta season verður mjög spennandi.  Strax hafa spennandi hlutir gerst.  Luis van Gaal (einn af uppáhalds þjálfurum Keizarans) hefur tekið við Bayern.  Þar hefur einnig bæst við framherjinn Mario Gomez frá Stuttgart.  Svo hefur Feliz Magath tekið við hinum sofandi risa, Schalke.  Diego frá Bremen er farinn till Juventus osfrv.

Svona í lokin vil ég hvetja fólk til að fara nú frekar að fylgjast með þýska boltanum. Þetta er miklu karlmannlegri og skemmtilegri deild heldur en einhverjar rigningardeildir í Englandi. 

Bara sem dæmi er að í Þýskalandi þá leikur þú ekki um bikar, þú leikur um SKJÖLD.    Það er kúl.

Viera

Vieira er lúmskur djöfull. Í fyrstu virkar þetta gróft brot en svo sér maður þetta frá öðru sjónarhorni. Samt fyndið hvað Hamann gerir, hann svona hálfpartinn hótar broti…

Hugleiðingar um landsleikinn í gær

Smávegis hugleiðingar varðandi landsleikinn í gær.  Hollendingar eru auðvitað mjög sterkir og þar að auki er völlurinn í Rotterdam mikil gryfja.  Pínu fyndið með væntingar Íslendinga til landsleiksins að það sem Íslendingar virtust stoltastir með fyrir leikinn var að menn mundu eftir Pétri Péturssyni í Rotterdam.  Er þetta ekki enn eitt dæmið þegar við föttum ekki að menn eru bara að reyna að vera kurteisir við gesti…….

Allavega.  Ég kom inn í leikinn þegar 30mín voru liðnar.  Staðan 1-0.  Þá fékk maður á tilfinninguna að Ísland væri statt í miðjum fellibyl og menn voru bara að reyna að halda sjó.  Hollendingarnir réðu miðjunni og sóttu grimmt upp báða kantana og Íslendingar voru svona í desperat “damage control”.  Van den Waart og Babel áttu nú frekar auðvelt með sína menn.  Ragnar Sigurðsson, sem er nú venjulega hafsent með IFK, var í hæ bakverðinum og réð nákvæmlega EKKERT við Babel.  

Mér fannst þetta lagast heilmikið í seinni hálfleiknum.  Kristján Örn var settur á móti Babel og gekk það miklu betur.  Kristján átti annars fínan leik.  áberandi besti leikmaður Íslands á vellinum fannst mér.  Seinni hálfleikur var mun betri hvað Ísland varðar.  Þetta hefur verið svona sambland af að Hollendingar dempuðust aðeins niður og Íslendingarnir voru aðeins grimmari. 

Hvað liðið varðar fannst mér Gunnleifur komast ágætlega frá leiknum.  Vörnin var hinsvegar misjöfn.  Kristján Örn átti fínan leik, Hermann fékk loksins að leika heilan fótboltaleik og fá þannig smávegis leikæfingu, Ragnar átti ekki sinn besta dag en Indriði komst skammlaust frá þessu. 

Miðjan, Stefán Gísla og Brynjar Örn skiluðu því sem vænst var af þeim.  Emil Hallfreðsson finnst mér hinsvegar að þurfi að fara að sína meira.  Hann spilar nú á Ítalíu og á að reyna meira sjálfur.  Svo er það þessi hægri kantur, Birkir.  Það er aldrei góðs viti að maður viti ekki að maður hafi spilað leik, fyrr en maður sér það í liðsuppstillingunni.  ‘I guðanna bænum, það hlýtur að vera til betri leikmaður í þessa stöðu.  Þeir hefðu alveg eins getað verið með sjúkraþjálfarann þarna á hægri kantinum. 

Eiður og Veigar voru svona lala.  Veigar kom mér á óvart og greinilega fullur af sjálfstrausti þessa dagana.  

Svona í lokin.  Eiður Smári.  Var soldið að fylgjast með honum í dag.  Hann skokkar allan tímann svona letilega á milli öftustu 4, svona eins og hann gangi á milli þeirra og segi “veistu ekki hver ég er !!! “  , fórnar höndum þegar hann fær ekki sendingar og það er alltaf eins og hann sé að hvíla sig fyrir næsta fasta leikatriði íslands sem hann tekur áuðvitað sjálfur, enda vítaskytta, aukaspyrnuskytta og svona yfirhöfuð bara almenn skytta. 

Annað í gær var að Þýskaland vann auðvitað þrælauðveldan sigur á Rússum.  Staðan 2-0 eftir 20minútur og leikurinn auðvitað búinn.  Enn á dónalegan hátt vildu Rússarnir halda áfram leiknum þrátt fyrir að allir viti bornir menn vissu að þetta væri búið.  Auðvitað hefði bara átt að hætta leiknum á þessum tímapunkti.  En, þeir léku áfram og náðu svo inn svona “mercy marki” , bara af því að Þjóðverjarnir vildu ekki vera vondir við Rússana.

Meistaradeildin – riðill H

Real Madrid  -  Bate Borisov  -  Juventus  -  Zenith

Real Madrid mun gera allt til að fara langt í keppninni þetta árið.  Síðustu ár hafa verið mögur í Meistaradeildinni og lifa þeir aðallega á fornri frægð, allavega í Evrópukeppninni.  Auðvitað er Real Madrid hroðalega vel mannað lið.  Þeir misstu reyndar af Portúgölsku grenjuskjóðunni og ég held að það hafi truflað liðið talsvert.  En lítið bara á uppstillinguna.  Casillas í markinu.  Bakverðirnir Heinze og Ramos, Canavaro og Pepe hafsentar.  Van den Waart og Robben á sitt hvorum vængnum, Guti og Raul, van Nistelroy frammi í sníkinu frammi.  Jú, þetta er gott lið og held að þeir fari uppúr riðlinum, sérstaklega þar sem Spánverjar hafa losnað við evrópsku minnimáttarkenndina útaf asnalega EM sigrinum í sumar.  Samt ekki sannfærður um að þeir fari alla leið.

Bate Borisov er frá Hvíta-Rússlandi.  Þarf að segja meira.  Leiðinda ferðalög fyrir hin liðin en þetta lið hefur ekkert í þennan riðil að gera, ekkert.

Juventus eru mættir aftur á gamlar slóðir eftir fjarveru vegna spillingarmálsins fræga.  Þeir náðu að halda nokkrum kempum allan þennan tíma eins og Buffon, Del Piero og Nedved.  Keizarinn er mjög spenntur fyrir hvernig Juve verður þetta árið.  Þeir hafa bætt við sig nokkrum athyglisverðum mönnum eins og Dananum Poulsen og svo náttúrulega skógarhöggsmanninum Olov Mellberg.  Juventus hefur alltaf verið “naglalið” og fer langt á hörkunni.   Ég spái þeim allavega að þeir fari áfram í riðlinum. 

Zenith frá Rússlandi er náttúrulega spútnikliðið í Evrópu og liðið sem allir eru með bóner yfir, aðallega þar sem enginn veit rassgat um þá.  Þeir unnu UEFA keppnina í fyrra eftir að hafa unnið Bayern Munchen 4-0 á heimavelli.  Ég minni á það að Pétursborg er höfuðborg rússnesku mafíunnar, þeir sem vinna þá á heimavelli hætta á það að “sleep with the fishes”.  Allavega.  Zenith er auðvitað með frábært lið og þeir náðu að halda Arshavin eftir mikið drama í sumar.  Ég held hinsvegar að þeir gætu ekki hafa verið óheppnari með riðil.  Eftir mikla baráttu held ég að þeir muni ekki hafa Juventus eða Real og sitja þannig eftir í þriðja sæti. 

Juventus og Real fara áfram, Bate vita ekki hvort þeir eru að koma eða fara og Zenith fara í UEFAkeppnina og vinna hana kannski…………..

Meistaradeildin – riðill G

Arsenal  -  Dynamo Kiev  -  Fenerbache  -  Porto

Arsenal hefur nú ekki unnið stóran titil í 4ár.  Pressan er því farin að aukast á Arsene Wenger um að skila titli.  Annars hefur Keizarinn lengi haldið því fram að Arsene Wenger sé með hárkollu, því hefur hinsvegar E-man þráfaldlega neitað.  Talsverðar mannabreytingar hafa orðið á hópnum,  Lehman, Hleb, Flamini og Silva eru farnir og þá er miðjan orðin reynsluminni en áður.  Fabregas er vissulega frábær leikmaður en spurningin er hvort hann geti borið þetta uppi.  Þeir hafa vissulega fengið nýja menn, m.a. Carlos Vela og frakkann Samir Nasri en þeir eru enn óskrifað blað í enska boltanum.  Annar punktur er að Emirates Stadium er ekki sama gryfjan og Highbury var og heimavöllurinn því ekki eins sterkur og áður.  Arsenal munu þó fara uppúr riðlinum en það verður spennandi.

Dynamo Kiev er orðið minna liðið í Úkraínu á eftir Shakhtar Doneksk.  Þeim var heldur betur Scheint í fyrra í Meistaradeildinni, töpuðu öllum leikjunum og gátu ekki rassgat.  Þeir eru ekki með eins sterkt lið og áður en eins og Napóleon og Hitler fengu að kynnast þá er bara ansi kalt þarna á veturna.  Því eru heimaleikirnir erfiðir fyrir útiliðin.  Spái hinsvegar Dynamo ekki velgengni í þessum riðli. 

Fenerbache náði góðum árangri í Meistaradeildinni og vilja meira.  Þeir fóru inn á Grund og náðu þar í geðstirða gamalmennið, Luis Aragones, 69ára.  Það verður örugglega gott fyrir gigtina að vera í hitanum í Tyrklandi en hinsvegar spurning hvort æsingurinn þarna stuðli að heilablóðfallinu sem Keizarinn hefur verið að spá honum lengi.   Fenerbache er eins og önnur tyrknesk lið, mjög erfiðir heim að sækja.  Menn eru almennt ánægðir ef þeir lifa af leikinn, hvað þá ef þeir ná stigi.  Eins og áður er erfitt að ráða í styrkleikann, stemningin mun ráða.  Þeir skíttöpuðu allavega fyrir Porto í fyrstu umferðinni í gær.

Porto er einhvernveginn orðið eins og gamli, leiðinlegi frændinn í fjölskylduboðinu.  Enginn man eftir að hafa boðið honum,  hann er leiðinlegur og hefur einhvernveginn ekkert nýtt fram að færa og svo segir hann sífellt grobbsögur af sjálfum sér þegar hann var yngri.  Jú, vissulega varð Porto Meistaradeildarmeistari hérna um árið en þá var Mourinho að þjálfa þá og Deco var á miðjunni.  Þeir státa af því að hafa hvorki meira né minna en 7 Argentínumenn í liðinu, og þá gerir maður nú einhvernveginn ráð fyrir því að þeir séu með gróft lið.  Keizarinn verður að viðurkenna að hann veit lítið um styrkleika liðsins nú um stundir en þeir unnu allavega Fenerbache í gær á heimavelli………

Spái því að Arsenal fari áfram, Fenerbache fylgir með ,   hinir fara að grenja, sérstaklega Portúgalarnir sem eru auðvitað þekktar grenjuskjóður…………..

Meistaradeildin – riðill F

Bayern  Munchen  -  Steua Búkarest  -  Lyon  -  Fiorentina

Bayern er besta lið keppninnar, punktur.  Spurningin er bara hvort dómararnir, Klinsmann eða stóra enska fótboltasamsærið eyðileggi þetta.  Svo hefur Ribery verið meiddur en hann er leikstjórnandi sóknarleiksins og allt fer í gegnum hann.  Bayern er annars með fáránlega vel mannað lið.  Þeir reyndu hinsvegar að styrkja það en Gattuso og Hleb vildu ekki koma, því miður.  Eins skrýtið og það er, þá lenti Gattuso í “slysi” fyrir stuttu þar sem hann “hrasaði ” og handleggsbrotnaði.  Sure, eins og Rummenigge hafi ekki pantað það slys…..   

Steaua Búkarest er annað tveggja rúmenskra liða í Evrópukeppninni og það er nú athyglisvert útaffyrir sig.  Þeir náðu hinsvegar ekki að vinna rúmensku deildina í fyrra og allt varð brjálað yfir því.  Ekki minna en 9byrjunarliðsmenn voru seldir og í staðinn flutt inn ódýrt vinnuafl frá suður-Ameríku.  Liðið er því stórt spurningarmerki þetta árið og ekki líklegir til afreka.  Menn verða væntanlega sendir til baka í mörgum, litlum kössum til baka til Suður-Ameríku ef illa gengur því að rúmenska mafían er ekkert til að leika sér við.

Lyon hafa unnið frönsku deildina svo oft að það er orðið hálf absúrd.  Á sínum tíma voru þeir alveg fáránlega góðir og menn bjuggust allt við stóra breikinu.  Það breik kom hinsvegar aldrei og liðið hefur veikst talsvert.  Þeir gætu farið uppúr riðlakeppninni en munu ekki gera neinar rósir í keppninni.  Þeir eru þó með ágætt lið fyrir utan það að svíinn Kim Källström leikur vinstri bakvörð hjá þeim ( hverjum datt það í hug). Voru heppnir að ná jafntefli við Fiorentina í fyrsta leiknum í gær og það á heimavelli. 

Fiorentina eru komnir í Meistaradeildina eftir alveg ótrúlegar sviptingar undanfarin ár.  Þeir voru dæmdir niður í Serie C á sínum tíma en fóru beint upp og núna komnir í Meistaradeildina þrátt fyrir að hafa misst Luca Toni til Bayern í fyrra.  Þeir eru með ákaflega beitta sóknarlínu, með rúmenska glæpamanninn Adrian Mutu og Alberto Gilardino og miða við þetta gamla góða að “skora fleiri mörk en hitt liðið”.  Sjáum til hvernig það gengur.  Spái þeim í baráttu um annað sætið í riðlinum.  

Bayern munu fara örugglega áfram, soldið erfitt að segja um hvort Lyon eða Fiorentina fylgi þeim, tippa á Lyon í ljósi reynslunnar……………….

Meistaradeildin – Riðill E

Man Utd  -  Villareal  -  Celtic  -  Álaborg

Man Utd eru auðvitað núverandi meistarar keppninnar.  Sagan er á móti þeim að þeir vinni deildina aftur þar sem ekkert lið hefur náð að verja titilinn.  Hinsvegar ættu Man Utd að vera sterkari núna ef eitthvað er.  Spurningin er bara hvernig Ronaldo verður….   Eins treglega og Unitedaðdáendurnir viðurkenna það, þá hafa þeir komist í þá stöðu að vera ógurlega háðir honum, háðari en menn viðurkenna.  Þeir eru búnir að bæta í framlína sína með einhverjum Búlgara sem allt í einu á að verða “hinn nýji Cantona”.    Riðillinn mun lítið reyna á United og þeir munu fara áfram en ekkert sérstaklega sannfærandi spái ég.

Villareal komst í undanúrslit Meistaradeildarinnar árið 2006 en náði ekki að halda forminu árið eftir.  Þeir lentu hinsvegar í öðru sæti í spænsku deildinni í fyrra, 10stigum á undan Barcelona.  Þjálfari þeirra, Pellegrini, státar af þeim árangri að hafa setið lengst allra þjálfara í spænsku deildinni svo geri aðrir betur.  Það er erfitt að spila á móti Villareal,  þær eru mjög skipulagðir og sterkir varnarlega og erfitt að vinna þá.  Svo hafa þeir einn besta holding miðjumann Evrópu, Marco Senna.  Munu berjast við Celtic um annað sætið.    

Celtic eru að stabilisera sig í Evrópu og verða betri og betri.  Þeir eru óumdeilanlega besta lið Skotlands og það er ekkert grína að spila við þá því að það er vont.  Líkamlegi styrkur þeirra vegur þungt nema kannski á móti United og ef Celtic fær horn á móti þér þá verðurðu pínu stressaður.  Þeir eru með fullt af skoskum traktorum sem eru stilltir á “on” allan leikinn og svo hafa þeir japanann Nakamura .  Einnig manninn með fáránlega langa nafnið “Jan Vennegoor of Hesselink”.  Spurningin er , hvernig fara þeir að því að skrifa nafnið aftan á peysuna hans.  Verða í baráttu við Villareal um annað sætið í riðlinum.  

Álaborg er annað skiptið í Meistaradeildinni.  Þeir voru tiltölulega hafnir með dráttinn í forkeppninni og þessvegna verða þeir með.  Þeir eru bara með uppá djókið, vita það að þeir munu aldrei komast áfram.  Taka þetta afslappað eins og sannir Danir og eru ekkert að æsa sig yfir hlutunum.  Náðu hinsvegar óvænt jafntefli við Celtic á útivelli í fyrstu umferð en það voru bara sökkerstig. 

Þannig að Man Utd fer áfram og Villareal og Celtic berjast um annað sætið.  Held að Celtic hafi það og hinir fari að grenja……sérstaklega Danirnir þar sem Danir eru aumingjar……………

Meistaradeildin – Riðill D

Liverpool  -  Marseilles  -  PSV Eindhoven -  Atlético Madrid 

Liverpool fylgir einhver ótrúleg heppni í Evrópukeppnum.  Held reyndar að Anfield hafi einhver intimiderandi áhrif á andstæðingaliðin og stemningin þar er reyndar erfið fyrir útiliðin.  Fleiri lið þyrftu að hafa guts eins og Wimbledon á sínum tíma, á tímum Vinnie Jones.  Sagan segir að á fyrsta ári Wimbledon í efstu deild þá voru þeir að fara að leika á Anfield.  Þegar þeir komu úr rútunni gengu þeir allir framhjá skilti fyrir utan völlin (sem er víst eitthvað frægt) þar sem á stendur This is Anfield.  Þegar þeir gengu þar framhjá þá hræktu allir leikmennirnir á skiltið !     Allavega.  Þetta var smávegis útúrdúr.  Liverpoolheppnin mun halda áfram.  Stundum held ég að lið sem er yfir á móti Liverpool í Evrópukeppninni muni lenda í því að besti leikmaðurinn þeirra verði fyrir eldingu í miðjum leik, þurfi að fara útaf og þessvegna vinni Liverpool á endanum.  Svo óendanleg er heppni þeirra.   Hinsvegar er auðvitað Liverpool með gott lið og einhvernveginn hentar öðrum löndum illa að spila við ensk lið.  Nema auðvitað Bayern. 

Marseilles -  þetta er þriðja franska liðið í Meistaradeildinni sem kemur á óvart þar sem franska deildin hefur nú ekki verið talin mjög sterk.  Heimildir Keizarans í Frakklandi herma að Frakkar telji Marseilles verða mjög sterkir í vetur.  Gamli últrabakvörðurinn úr hinu ógleymanlega HM-liði Belgíu 1988, Eric Gerets er að þjálfa þá.  Þeir misstu náttúrulega Nasri til Arsenal en hafa innanborðs Ben Arfa sem er óútreiknanlegur á miðjunni.  

PSV eru einhvernveginn alltaf með í Meistaradeildinni en ljóminn yfir þeim hefur óneitanlega dofnað síðan Ronald Koeman og félagar léku með þeim.    Þeir eru ekki beint í Meistaradeildarklassa en lið sem erfitt er að vinna.  Hafandi sagt þetta þá töpuðu þeir fyrir Atletico 3-0 sem kom soldið á óvart.  Sænski landsliðsmarkmaðurinn Andreas Isakson var keyptur til þeirra fyrir seasonið.  Það er klassamarkmaður sem mun fylla skarðið eftir Gomes sem fór til Tottenham.  Huub Stevens sem var þjálfari lengi hjá Shalke 04 í Þýskalandi er að þjálfa þá.  Vandamál PSV er að þeir missa alla sína bestu leikmenn þar sem þetta er ekki nógu fjárhagslega sterkur klúbbur.  T.d. van Nistelroy, van Bommel, Robben, Kezman, Cocu, Gomes og Farfan.  Eru þessvegna ekki nógu sterkir í ár til að berjast við stóru strákana…..

Atlético Madrid missti sína helstu stjörnu, Fernando Torres til Liverpool í fyrra.  Hinsvegar náðu þeir fjórða sæti í spænsku deildinni í fyrra þrátt fyrir það.  Þeir eru nú bara með nokkuð vel skipað lið.  Franski landsliðsmarkvörðurinn Gregory Coupet er í markinu, í vörninni eru þeir með Johnny Heitinga og Tékkan Tomas Ujfalusi.  Á miðjunni er t.d. Argentínumaðurinn Maxi Rodriquez ( þessi sem skoraði flotta markið á móti Mexíkó á síðasta HM ) og svo frammi er Diego Forlan og Argentínumaðurinn Sergio Aguero.  Þetta er vel skipað lið sem gæti alveg gert góða hluti.  Unnu PSV mjög sannfærandi í gær og eru til alls líklegir.

Spáin.   Liverpool fer áfram á krónísku Evrópuheppninni, Atlético fylgir þeim áfram.  Hinir fara að grenja….

Meistaradeildin – Riðill C

Barcelona  -  Sporting Lissabon   -  Shaktar Donesk  -  Basel

Barcelona er soldið spurningamerki.  Stokkuðu allt upp, Guardiola orðinn þjálfari sem lýsti því yfir að nokkrir leikmenn myndu fara.  Deco fór, Ronaldinho fór en enginn vildi kaupa Etoo sem þó vildi víst fara.  Hinsvegar vildi Eiður ekki fara og sitja þeir uppi með hann enn eina ferðina.  Hvað þarf að segja leikmanni oft að hann megi nú fara og einhverntímann var meiraaðsegja haft eftir stjóra Barcelona að þeir “myndu meiraaðsegja hjálpa honum við að finna sér lið”.  Þetta er orðið svo langdregið að það er hætt að vera vandræðalegt.  Barcelona gætu orðið í erfiðleikum með að finna taktinn eftir þessar breytingar.  Þeir hafa heldur ekki keypt neina ógurlega menn en Henry gæti fundið sig í vetur.  Gleymum því ekki heldur að þeir hafa enn Lionel Messi. 

Sporting Lissabon -  þetta nafn hefur af einhverjum ástæðum alltaf farið í taugarnar á mér.  Liðið sjálft getur hinsvegar ekki farið í taugarnar á neinum þar sem þeir eru bara með og vilja ekki vera fyrir neinum.  Þeir hafa hinsvegar framleitt ótrúlega marga unga menn sem eru orðnar dópaðar unglingastjörnur núna eins og Ronaldo, Hugo Viana, Ricardo Quaresma og Nani.  Þar sem þessir eru allir farnir eru þeir ekki líklegir til afreka í riðlinum og enda neðarlega. 

Shakhtar Donetsk er frá Úkraínu.  Flestir muna eftir Dynamo Kiev en þetta lið vann notabene Úkraínsku deildina í fyrra.  Eigandi þeirra er olíusykurpabbi og vill árangur í Evrópu.  Eru með nokkra brassa og Króatann Dario Srna sem maður aðallega man eftir þar sem hann er með pirrandi nafn.  Byrjuðu vel með því að ná að vinna Basel á útivelli í gær. 

Basel er besta lið Sviss og þjálfað af sköllóttu steikinni honum Cristian Gross.  Hann var einu sinni þjálfari Tottenham og þá aðallega frægur fyrir hvað hann var lítið frægur.  Hinsvegar er hann góður stjóri.  Basel gæti notið góðs af því að hafa verið í Evrópukeppnunum undanfarið svo þeir hafa öðlast pínu rútínu í bransanum.  Þeir hafa einu sinni komist upp úr riðlakeppninni, 2öö2-2öö3 og stefna á að gera það aftur núna.  Liðið leikur gífurlega agað og skipulega ( enda hefur leitin að ónákvæmum Svisslendingi ekki enn borið árangur) og er skeinuhætt á heimavelli.  Töpuðu reyndar í gær fyrir Shakthar sem gæti reynst dýrkeypt í lokin. 

Spáin er þessi.  Barcelona gæti ekki verið heppnari með riðil og fer áfram fyrst og fremst á því að heita Barcelona.  Hörð barátta um annað sætið en ég ætla að tippa á að Úkraínski veturinn hjálpi Shaktar við að vinna sína heimaleiki og komist í annað sætið.